سياسة الخصوصية
وصل تطبيق لأصحاب المولدات الأهلية وجُباتهم ومشتركيهم. هذي الصفحة تشرح شنو نحفظ، وليش، وشلون تحذفه.
مين إحنا
وصل يطوّره حسنين عبدالله الحميدي، مطوّر مستقل بالبصرة، العراق. هو المسؤول عن بياناتك بهذا التطبيق، وتكدر تراسله على support@hasanain.dev.
شنو نحفظ
- حسابك: البريد أو الاسم اللي يجي من Google أو Apple أو البريد اللي سجلت بيه. المشترك اللي يربط بالرمز يكون حسابه بدون بريد.
- سجلات المولدة اللي يدخلها صاحبها وموظفيه: أسماء المشتركين، رقم الهاتف، رقم البيت والجوزة، الأمبيرات، التسعيرة، الاشتراكات، التسديدات والوصولات، المصاريف.
- رقم يميّز جهازك حتى تكون أرقام الوصولات فريدة، ورمز الإشعارات اللي يعطيه Firebase لجهازك، واشتراكات الإشعارات لمولداتك.
- حسابات الدفع اللي يضيفها صاحب المولدة (زين كاش، كي، الحساب البنكي...) حتى يشوفها مشتركينه، والدفعات اللي يبلّغ عنها المشترك ويا صورة التحويل إذا أرفقها. وصل ما يحوّل فلوس.
وين تنحفظ
على جهازك أول (التطبيق يشتغل بدون انترنت)، ولمن تسجّل دخول تتزامن ويا خوادمنا على Cloudflare. تسجيل الدخول والإشعارات عن طريق Firebase من Google. رسائل رموز التأكيد وتغيير كلمة المرور ترسلها خدمة Resend.
حتى نتأكد إن الطلبات جاية من نسخة أصلية من التطبيق نستخدم Play Integrity من Google و App Attest من Apple. ما يوصلنا منهم غير نتيجة الفحص.
اللي يدير وصل يكدر يشوف بيانات الحسابات والمولدات حتى يشغّل الخدمة ويحميها (مثلاً حتى يوقف الاحتيال)، ويكدر يرسل إشعارات عن الخدمة. كل تغيير يسويه على حساب، وكل إشعار يرسله، ينسجل.
شنو ما نسويه
- ما نبيع بياناتك ولا نشاركها للإعلانات.
- ما نستخدم الموقع الجغرافي.
- ما نقرا رسائلك أو جهات اتصالك.
كم نحتفظ بيها
تبقى ما دام حسابك موجود. لمن تحذف حسابك تنحذف من خوادمنا فوراً، وممكن تبقى نسخة بسجل الاسترجاع التلقائي لقاعدة البيانات لمدة أقصاها 30 يوم، وبعدها تنمسح وحدها.
صورة التحويل اللي يرسلها المشترك تنحذف من خوادمنا بعد 3 أيام، والدفعات المبلّغ عنها بعد 90 يوم من الرد عليها.
هذا الموقع
موقع وصل ما يستخدم كوكيز ولا أدوات تتبع ولا إعلانات، والخطوط محفوظة عليه نفسه. Cloudflare يوصّل الصفحات ويحميها، ويشوف عنوان IP مثل أي موقع.
الأطفال
وصل للكبار اللي يديرون مولدة أو يسددون اشتراكها، ومو موجّه للأطفال.
التغييرات
إذا غيّرنا هذي السياسة نحدّث التاريخ بالأسفل، وإذا التغيير مهم نبلغكم بالتطبيق.
احذف حسابي
- افتح وصل وسجّل دخول.
- روح على «المزيد» ثم «الحساب».
- اضغط «احذف حسابي» وأكّد.
- إذا حسابك بيه بريد، اكتب الرمز اللي يوصلك عليه حتى نتأكد إنه حسابك.